Dyddiadur Cyrsiau

Mae gwerthuso yn fuddsoddiad sylweddol o ran amser ac adnoddau i bractisau. Bydd y gweithdy rhyngweithiol hwn yn rhoi'r sgiliau a'r offer i reolwyr i ailfywiogi eu proses er mwyn sicrhau ei bod yn cyflawni amcanion pendant.

Bydd y gweithdy yn darparu canllawiau a gwaith papur i gefnogi creu gwerthusiadau, gan gynnwys gwerthuso tîm a defnyddio dull 360°.

Asthma yw'r cyflwr meddygol hirdymor mwyaf cyffredin yn achos plant yn y DU, ac mae cyfraddau mynychder, derbyniadau brys a marwolaethau asthma yn ystod y plentyndod yn y wlad hon ymhlith yr uchaf yn Ewrop. Fe wnaeth yr Adolygiad Cenedlaethol o Farwolaethau yn sgil Asthma, a gyhoeddwyd yn 2014, ganfod ffactorau y gellir eu hosgoi yn achos y rhan fwyaf o farwolaethau yn sgil asthma ac fe wnaeth gynnig argymhellion pendant i wella safonau gofal a lleihau nifer y marwolaethau ond mae safonau gofal i gleifion sydd ag asthma yn y DU ac mewn llawer o wledydd ledled y byd yn dal yn wael. Yn ogystal â lefelau marwoldeb, mae deilliannau iechyd i blant a phobl ifanc sydd ag asthma yn amrywio'n sylweddol, ond maent yn waeth i'r rhai sy'n byw yn yr ardaloedd mwyaf difreintiedig. Bydd sylfeini iechyd pobl, a osodir cyn i blant gael eu geni, yn cael eu datblygu yn ystod plentyndod, ac yn ystod y cyfnod hwn, sefydlir tueddiadau iechyd a lles a wnaiff bara am oes. Mae asthma yn gyflwr resbiradol hirdymor cyffredin, felly mae dulliau rheoli effeithiol gan wasanaethau gofal iechyd a dulliau hunan-reoli effeithiol yn hollbwysig er mwyn cynorthwyo plant a phobl ifanc i gyflawni eu potensial llawn ym mhob agwedd ar eu bywyd.  Caiff y cwrs ei lywio gan diwtor sy'n weithiwr iechyd proffesiynol sydd â phrofiad helaeth o weithio gyda phlant a phobl ifanc sydd ag asthma, a bydd yn camu tu hwnt i hanfodion deall asthma ac yn ymdrin â datblygu gwybodaeth a sgiliau i alluogi myfyrwyr i roi'r gwersi a ddysgir ganddynt ar waith er mwyn cyflawni gofal rhagorol yn eu practis clinigol.

Mae asthma yn un o'r cyflyrau meddygol hirdymor mwyaf cyffredin ledled y byd ac yn un o brif achosion afiacheddau, gan achosi beichiau sylweddol ar gleifion, gwasanaethau iechyd a'r gymdeithas yn ehangach. Er y caiff ei ystyried yn aml yn gyflwr acíwt, gellir osgoi pyliau o asthma trwy gyfrwng gofal o'r ansawdd uchaf a chymorth da i gynnal dulliau hunan-reoli. Gellid osgoi 90% o'r derbyniadau i ysbytai yn sgil asthma acíwt, a cheir ffactorau y gellid bod wedi'u hosgoi yn achos mwyafrif y marwolaethau yn sgil asthma. Cydnabyddir yn gynyddol fod asthma yn "derm ambarél" ac mae'n afiechyd cymhleth. Mae dulliau rheoli wedi'u teilwra i ddiwallu anghenion unigolion yn hanfodol er mwyn gwella deilliannau cleifion ac atal marwolaethau y gellir eu hosgoi. Mae datblygiadau diweddar o ran dirnadaeth gwyddonwyr a chlinigwyr o asthma wedi llywio trywyddion newydd o ran y meddylfryd presennol a dulliau presennol o ddarparu gofal ym mhob lleoliad gofal iechyd, ac archwilir y rhain yn ystod y cwrs. Caiff y cwrs ei lywio gan diwtor sy'n weithiwr iechyd proffesiynol sydd â phrofiad helaeth o weithio gyda chleifion sydd ag asthma, a bydd yn camu tu hwnt i hanfodion deall asthma ac yn ymdrin â datblygu gwybodaeth a sgiliau i alluogi myfyrwyr i roi'r gwersi a ddysgir ganddynt ar waith er mwyn cyflawni gofal rhagorol yn eu practis clinigol.

Nod y modiwl addysg broffesiynol hwn yw sicrhau bod myfyrwyr yn datblygu dirnadaeth fanylach ynghylch maes COPD. Bydd myfyrwyr yn dod i ddeall sut y defnyddir dulliau canfod hanes a chynnal profion diagnostig pwysig megis sbirometreg i sicrhau diagnosis diogel a chywir. Byddant yn gallu dirnad a gweithredu egwyddorion rheoli COPD, gan integreiddio theori newid ymddygiad, dulliau addasu  ffyrdd o fyw a therapi â chyffuriau priodol i leihau'r beichiau a'r risgiau sy'n gysylltiedig â COPD, a byddant yn dysgu sut i adolygu a gofalu am gleifion yn effeithiol, beth bynnag fod cam eu clefyd, yn cynnwys cleifion sydd â chlefyd acíwt sy'n gwaethygu. Ymdrinnir ag ymyriadau pwysig ym maes COPD, er enghraifft, adsefydlu'r ysgyfaint a rheoli methiant resbiradol, gan gyfeirio at dystiolaeth a chanllawiau cyfredol. Ymdrinnir hefyd ag effaith COVID-19 ar ofal i bobl sydd â COPD yn y modiwl hwn.

Diben y cwrs hwn yw cynnig gwybodaeth gyfoes a hawdd ei deall ynghylch materion allweddol yn ymwneud â methiant y galon. Byddwch yn cael arweiniad ynghylch cyfres o bynciau hanfodol yn ymwneud â rheoli methiant y galon, ac yn ystyried agweddau ar ddarparu gofal mewn amrywiaeth o leoliadau gofal iechyd. Mae'r pynciau yn cyd-fynd â'r cymwyseddau ym maes nyrsio cleifion â methiant y galon a gafodd eu cyhoeddi yn Ionawr 2021, yn cynnwys sut i ymchwilio i achosion honedig o fethiant y galon a rôl y tîm amlddisgyblaethol o ran hwyluso hunanofal. Ehangir fformat poblogaidd cyflwyniadau byr a gweithgareddau sy'n cael eu llywio gan diwtoriaid trwy gyflwyno cyfres o astudiaethau achos sy'n ymdrin â rhoi'r gwersi a ddysgir ar waith ac ystyried cydafiacheddau. Ategir eich profiad dysgu â chyfleoedd i asesu eich cynnydd gan ddefnyddio'r gweithgareddau 'gwirio gwybodaeth' ar ddiwedd pob adran. Mae hwn yn gwrs sydd wedi'i adolygu gan gymheiriad ac wedi'i ddatblygu gan glinigwr profiadol ym maes methiant y galon sydd wedi ymrwymo i wella gofal i gleifion trwy gyfrwng ymchwil ac addysg. Trwy gyfranogi yn y cwrs hwn, byddwch yn gwella eich gwybodaeth a'ch sgiliau ym maes rheoli methiant y galon ac yn cryfhau'r gofal seiliedig ar dystiolaeth yr ydych yn ei ddarparu i'r garfan hon o gleifion.

Mae dirnadaeth wyddonol ynghylch asthma wedi datblygu'n gyflym yn ystod blynyddoedd diweddar ac mae'r dull o ddarparu gofal i gleifion sydd ag asthma yn newid yn sgil hynny. Yn ogystal â diweddariad ynghylch tystiolaeth ac arferion sy'n seiliedig ar ganllawiau, bydd y cwrs hwn yn bwrw golwg dros ddatblygiadau yn ymwneud ag ymchwil ynghylch asthma a'u trosi'n arferion clinigol.
Bydd y cwrs yn ymdrin â'r canlynol:
• adolygu dulliau o gynnal diagnosis cynnar a manwl gywir ymhlith plant ac oedolion, a dulliau rheoli priodol sydd wedi'u teilwra yn unol ag anghenion a dymuniadau cleifion unigol
• gwerthuso materion cyfredol ym maes gofal i gleifion sydd ag asthma, yn cynnwys rheoli risg, ystyriaethau yn ymwneud â'r amgylchedd, apwyntiadau o bell a nodweddion asthma y gellir eu trin.
Mae'r cwrs hwn yn addas i weithwyr iechyd proffesiynol sydd â phrofiad o reoli cleifion sydd ag asthma ac sydd eisoes wedi cwblhau hyfforddiant ynghylch asthma ar lefel sylfaen/diploma.

Asthma yw'r cyflwr meddygol mwyaf cyffredin ymhlith plant a phobl ifanc. Mae'n hanfodol i'r holl weithwyr proffesiynol gofal iechyd sy'n gweithio gyda'r garfan hon allu dirnad a deall y broses ddiagnostig a'r opsiynau priodol o ran rheoli'r cyflwr ar gyfer plant unigol. Bydd y cwrs hwn yn cynnig rhagarweiniad ynghylch asthma ymhlith plant a phobl ifanc a bydd yn galluogi gweithwyr proffesiynol i weithredu'r gwersi y byddant wedi'u dysgu yng nghyd-destun eu harferion clinigol gwirioneddol. Ystyrir gwerth gofal integredig, ac ystyrir sut gall gweithwyr proffesiynol ym meysydd gofal sylfaenol ac eilaidd, ysgolion, gwasanaethau brys a gwasanaethau triniaethau dydd fynd ati i gydweithio.

Mae'r cwrs hwn yn addas i unrhyw weithiwr proffesiynol gofal iechyd sy'n gweithio mewn lleoliadau gofal sylfaenol ac yn y gymuned ac yn cyfrannu at ofalu am gleifion sydd â bronciectasis. Bydd y cwrs hwn yn ymdrin ag epidemioleg, pathoffisioleg, diagnosio, opsiynau o ran triniaethau, strategaethau hunan-reoli a rheoli cyflyrau sy'n gwaethygu. Mae'r cwrs wedi'i lunio gan nyrs sy'n brofiadol ym maes clefydau resbiradol sy'n ymdrechu'n deg i wella ansawdd bywyd cleifion sy'n profi effeithiau clefyd resbiradol yn eu bywyd beunyddiol.

Mae'r cwrs hwn yn addas i unrhyw weithiwr iechyd proffesiynol sy'n gweithio mewn lleoliadau gofal sylfaenol ym maes clefyd coronaidd y galon (CHD). Mae'n cynnig cyfle i adolygu arferion presennol sy'n seiliedig ar dystiolaeth a gweithredu'r hyn mewn perthynas ag astudiaethau achos a gwaith go iawn. Bydd y modiwl hwn yn gyfystyr â 7.5 awr o DPP at ddibenion ail-ddilysu.